Langi Ziit isch Schwiizerdütsch nur e gsprochni Sprach gsi – uf Papier isch nume Hochdütsch gängig gsi, wo us dem Grund ide Schwiiz au als «Schriftdütsch» bezeichnet wird. Das hät sich aber bsunders mitem Ufchoo vo Instant Messaging und Chat-Apps wie Threema gänderet: Dur de informell Charakter vo Churznachrichte isch d’Mundart naadisnaa au ide schriftliche Kommunikation meh bruucht worde.
Jetzt macht s’Schwiizerdütsche nüme bi de Nachrichte halt: Ab sofort isch au üsi App sälber uf Schwiizerdütsch verfüegbar. Wer Schwiizerdütsch redt, weiss aber, dasses nöd eis einzigs Schwiizerdütsch git, sondern dass de Begriff verschiedeni Dialäkt zämefasst, wo sich vo Region zu Region (zum Teil starch) unterscheidet.
Wil d’Betriebssystem dem Umstand kei Rächnig träged und nur ei Sprachiistellig für d’Schwiiz abütet, händ mir üs für die Mundart entschide, wo im Zürioberland gredt wird und bi üs im Büro hüüfig z’ghöre isch. Und wil s’Schwiizerdütsch und demit au d’Dialäkt kei offizielli Rächtschriibig händ, isch d’Übersetzig vode Threema-App nach üsem Guetdünke und üsere eigene Redewiis gmacht worde.
So chönd Sie d’App uf Schwiizerdütsch umstelle:
Android (ab Version 5.3): Tipped Sie ide Threema-App uf die drü Pünkt rächts obe, wähled Sie «Einstellungen > Erscheinungsbild > Sprache», und tipped Sie uf «Schwiizertüütsch».
iOS (ab Version 6.0): Öffned Sie d’Iistellige vo Ihrem Natel, scrolled Sie bis zu Threema, und wähled Sie deet «Schwiizertüütsch (Schwiiz)» unter «Bevorzugte Sprache». Falls die Option nöd aazeigt wird, müend Sie Schwiizerdütsch zerscht under «Allgemein > Sprache & Region» dezuetue.